येरवडा-कात्रज भुयारी मार्गाचा प्रस्ताव तातडीने सादर करा; मुख्यमंत्री फडणवीस यांचे निर्देश
पुणे: पुणे शहरातील वाहतूक समस्यांवर उपाय शोधण्यासाठी येरवडा आणि कात्रज दरम्यान भुयारी मार्ग तयार करणे आवश्यक आहे. मुख्यमंत्री देवेंद्र फडणवीस यांनी यासाठी तातडीने प्रस्ताव सादर करण्याच्या सूचना दिल्या. या भुयारी मार्गासाठी ‘ट्वीन टनेल’ पद्धतीचा वापर करण्यात यावा, असेही त्यांनी म्हटले.
पुणे महानगर प्रदेश विकास प्राधिकरण (PMRDA) व मुंबई येथील सह्याद्री अतिथीगृह येथे बुधवारी आयोजित बैठकीत मुख्यमंत्री फडणवीस यांनी या प्रकल्पाबाबत महत्त्वपूर्ण निर्णय घेतले. या बैठकीस उपमुख्यमंत्री अजित पवार, उच्च व तंत्र शिक्षणमंत्री चंद्रकांत पाटील, नगरविकास राज्यमंत्री माधुरी मिसाळ, PMRDAचे आयुक्त डॉ. योगेश म्हसे यांच्यासह अन्य अधिकारी उपस्थित होते.
‘ट्वीन टनेल’ पद्धतीचा वापर होईल
मुख्यमंत्र्यांनी या भुयारी मार्गासाठी आधुनिक तंत्रज्ञानाचा वापर करण्यावर जोर दिला. ‘ट्वीन टनेल’ पद्धतीचा वापर करून हा मार्ग तयार करावा, असे निर्देश त्यांनी दिले. यामुळे वाहतूक वेगवान होईल आणि शहराच्या वाहतुकीवरील ताण कमी होईल, असे आश्वासन त्यांनी दिले.
नवीन रस्त्यांसाठी निधी मंजूर
यावेळी, पुणे शहरासाठी नवीन पुरंदर विमानतळ रस्ते जाळ्यांसाठी 636.84 कोटी रुपयांचा निधी मंजूर करण्यात आला. याशिवाय, रांजणगाव आणि हिंजवडी औद्योगिक क्षेत्रातील सिमेंट रस्त्यांसाठी 203 कोटी रुपयांचा निधी दिला. ‘अर्बन ग्रोथ सेंटर’ साठी रस्त्यांचे जाळे तयार करण्यासाठी 1 हजार 526 कोटी रुपयांची तरतूद करण्यात आली.
हे देखील वाचा: कात्रज डेअरीच्या अध्यक्ष, उपाध्यक्षांची उद्या निवड; खेड तालुक्याला संधी मिळण्याची शक्यता
पायाभूत सुविधांवरील प्राधान्य
मुख्यमंत्र्यांनी प्राधिकरणाला शहरी विकासाच्या योजनांची वेळेत अंमलबजावणी करण्याचे निर्देश दिले. त्यांनी पाणीपुरवठा योजना, वीजपुरवठा, रस्ते आणि मलनिस्सारण यांसारख्या पायाभूत सुविधांवर विशेष लक्ष देण्याचे सांगितले. तसेच, विकास योजनेसाठी रस्त्यांची रुंदी 18 मीटर ठेवण्यासाठी नियमांमध्ये बदल करणे आवश्यक असल्याचे त्यांनी स्पष्ट केले.
नवीन बसेस आणि वाहतूक सुधारणा
मुख्यमंत्र्यांनी पुणे महानगर परिवहन महामंडळ (PMPMML) च्या बसेसला सीएनजीचे पर्यावरणपूरक इंधन दिले जावे. पुणे शहरात 500 नवे बसेस दिले जातील, आणि भविष्यातही त्यांना व्यवस्थापनाचा कोणताही प्रश्न येणार नाही, याची काळजी घेतली जाईल.
नवीन मेट्रो प्रकल्पासाठी जागेचे हस्तांतरण
मुख्यमंत्र्यांनी पुणे राजभवन आवारातील जागा मेट्रोच्या उड्डाणपूल सेवेसाठी देण्याची कारवाई तातडीने पूर्ण करण्याच्या निर्देश दिले.
विकास योजना दोन टप्प्यात राबवा
मुख्यमंत्र्यांनी विकास योजनांच्या अंमलबजावणीसाठी दोन टप्प्यात काम करण्याचे सुचवले. पहिल्या टप्प्यात पायाभूत सुविधा, रस्ते, पाणीपुरवठा आणि मलनिस्सारण यांसारख्या मूलभूत गोष्टींचा समावेश करण्यात येईल, आणि दुसऱ्या टप्प्यात इतर सुविधा जसे की वीजपुरवठा, वाचनालय, स्मशानभूमी व इतर विकास प्रकल्प अंमलात आणले जातील.
यासोबतच, प्राधिकरणाने भविष्यातील लोकसंख्येचा विचार करीत पाण्याच्या पुनर्वापरावर भर देण्याचा निर्णय घेतला आहे. मुख्यमंत्र्यांच्या या महत्त्वपूर्ण बैठकीत घेतलेले निर्णय पुणे शहराच्या विकासासाठी आणि वाहतूक समस्यांवरील उपायांसाठी महत्त्वाचे ठरतील. येरवडा-कात्रज भुयारी मार्गाच्या प्रस्तावित ‘ट्वीन टनेल’ पद्धतीने पुणे शहरातील वाहतूक सुधारण्यास मोठे सहाय्य होईल.
