पुणे जिल्ह्यात कुस्तीचा थरार! वडगाव काशीबेगमध्ये मुलींच्या कुस्त्या ठरल्या आकर्षणाचे केंद्र
मंचर (ता. आंबेगाव): श्री क्षेत्र वडगाव काशिंबेग (ता. आंबेगाव) येथे श्रीराम उत्सवानिमित्त आयोजित कुस्त्यांचा जंगी आखाडा पार पडला आणि या आखाड्यात नामवंत पैलवानांच्या दमदार कुस्त्यांबरोबरच मुलींच्या कुस्त्यांनी उपस्थितांचे लक्ष वेधून घेतले.
गावालगतच्या शेतात या कुस्तीसाठी विशेष मैदान तयार करण्यात आले होते. पंचमंडळींच्या उपस्थितीत श्रीफळ वाढवून आखाड्याला उत्साहात सुरुवात झाली. सुरुवातीला छोट्या मुलांच्या कुस्त्यांनी रंगत भरली आणि या बालपैलवानांनीही आपली चमक दाखवली. त्यानंतर मुख्य कुस्त्यांचा थरार सुरू झाला, जिथे पैलवानांनी मैदानात फिरून आपले प्रतिस्पर्धी निवडले आणि हलगीच्या तालावर चितपटच्या कुस्त्यांचा रोमांच अनुभवयास मिळाला.
या कुस्त्यांदरम्यान उपस्थित प्रेक्षकांनी टाळ्यांच्या गजरात पैलवानांना दाद दिली. पुणे जिल्ह्यासह परिसरातील अनेक भागातून पैलवान या आखाड्यात सहभागी झाले होते. यात्रा समितीच्या वतीने विजेत्या पैलवानांना आकर्षक रोख बक्षिसे प्रदान करण्यात आली, तसेच अनेक ग्रामस्थांनीही वैयक्तिक बक्षिसे देऊन या खेळाडूंना प्रोत्साहन दिले.
हे देखील वाचा: लोकसभेत आज वक्फ विधेयकावर रणसंग्राम; सरकार आणि विरोधक आमनेसामने
या कुस्ती आखाड्याचे वैशिष्ट्य म्हणजे यात महिला पैलवानांनीही सक्रिय सहभाग घेतला. मंगरूळ आणि पारगाव येथील संजीवनी चव्हाण व मोनिका चव्हाण या दोन सख्ख्या बहिणींची कुस्ती विशेष लक्षवेधी ठरली. निर्धारित वेळेत या दोघींची कुस्ती अनिर्णित राहिल्याने दोघांनाही गौरविण्यात आले आणि उपस्थित ग्रामस्थांनीही या दोन्ही बहिणींना उत्स्फूर्तपणे रोख बक्षिसे दिली.
या कुस्ती स्पर्धेसाठी लव्हाजी पिंगळे आणि संजय तारु यांनी पंच म्हणून उत्कृष्ट काम पाहिले. शंकरराव डोके, बाळासाहेब पिंगळे, सरपंच वैभव पोखरकर आणि श्रीकृष्ण पतसंस्थेचे अध्यक्ष बाळासाहेब पिंगळे यांच्यासह अनेक ग्रामस्थांनी या कार्यक्रमाचे यशस्वी नियोजन केले.
ग्रामस्थांचा उत्स्फूर्त प्रतिसाद:
वडगाव काशीबेग येथील या कुस्ती आखाड्याला ग्रामस्थांनी उत्स्फूर्त प्रतिसाद दिला आणि महिला पैलवानांच्या सहभागाचे विशेष कौतुक केले. या कार्यक्रमामुळे गावाला उत्साहाचे आणि आनंदाचे वातावरण लाभले.
