शिवसृष्टीच्या तिसऱ्या टप्प्यासाठी ५० कोटी रुपयांचा निधी, मुख्यमंत्र्यांची मोठी घोषणा
पुणे : मुख्यमंत्री देवेंद्र फडणवीस यांनी १९ फेब्रुवारी रोजी पुण्यात शिवसृष्टीच्या दुसऱ्या टप्प्याच्या लोकार्पणावेळी एक महत्त्वाची घोषणा केली. राज्य सरकारने शिवसृष्टीच्या तिसऱ्या टप्प्याच्या कामासाठी ५० कोटी रुपयांचा निधी मंजूर केला आहे, असे त्यांनी सांगितले.
शिवसृष्टीतील दालनाचा प्रेरणादायी उद्देश
मुख्यमंत्री फडणवीस यांच्या हस्ते लोकार्पण झालेल्या दुसऱ्या टप्प्यात शिवसृष्टीच्या दालनाचा उद्देश केवळ छत्रपती शिवाजी महाराजांच्या जीवनाचे विविध पैलू समोर आणणे नाही, तर त्यामध्ये स्वराज्य, स्वधर्म आणि स्वभाषेच्या महत्त्वावर देखील प्रकाश टाकणे आहे. हे दालन विद्यार्थ्यांसाठी प्रेरणा आणि अभ्यासाचे केंद्र ठरेल, असे फडणवीस यांनी सांगितले.
मुख्यमंत्र्यांची भाषणाची मुख्य मुद्दे
मुख्यमंत्री फडणवीस म्हणाले, “पंतप्रधान नरेंद्र मोदी यांनी मराठी भाषेला अभिजात दर्जा दिला आहे. छत्रपती शिवाजी महाराजांनी मराठीला राजभाषेचा दर्जा दिला, आणि राज्यकारभार देखील मराठीतून सुरू केला.” त्यांनी छत्रपती शिवाजी महाराजांच्या विचारधारेचे महत्त्व यावेळी अधोरेखित केले.
हे देखील वाचा: पुणे जिल्हा युवा मोर्चाच्या कार्यकारी अध्यक्षपदी गणेश कवडे
कार्यक्रमात प्रमुख उपस्थिती
या कार्यक्रमात केंद्रीय सहकार आणि नागरी विमान वाहतूक राज्यमंत्री मुरलीधर मोहोळ, राज्याचे उच्च आणि तंत्र शिक्षण मंत्री चंद्रकात पाटील, माहिती तंत्रज्ञान आणि सांस्कृतिक कार्य मंत्री अॅड. आशिष शेलार, खासदार छत्रपती उदयनराजे भोसले, महाराष्ट्र प्रदेश संघचालक नाना जाधव आणि इतर मान्यवर उपस्थित होते.
कार्यक्रमाचे प्रास्ताविक जगदीश कदम यांनी केले, तर सूत्रसंचालन डॉ. अजित आपटे यांनी केले. आभार प्रदर्शन विनीत कुबेर यांनी केले.
मुख्यमंत्र्यांची घोषणाः ५० कोटीचा निधी मंजूर
मुख्यमंत्र्यांच्या घोषणेने पुण्यातील शिवसृष्टीच्या तिसऱ्या टप्प्याच्या विकासाला गती मिळणार आहे. या निधीचा उपयोग शिवसृष्टीच्या पुढील विकासासाठी आणि छत्रपती शिवाजी महाराजांच्या विचारधारेच्या प्रसारासाठी केला जाईल.
संपूर्ण महाराष्ट्रातील नागरिक आणि विशेषतः पुणे जिल्ह्यातील लोक या घोषणेवर आनंद व्यक्त करत आहेत.
