प्रजासत्ताक दिनाची सुट्टी रद्द: शाळा सुरू राहणार; राज्य सरकारचा महत्त्वपूर्ण निर्णय
मुंबई: २६ जानेवारी रोजी राज्यासह देशभरात प्रजासत्ताक दिवस साजरा केला जातो. या दिवशी देशभरातील शालेय विद्यार्थ्यांना सकाळी झेंडावंदन दिल्यानंतर सार्वजनिक सुट्टी दिली जाते. मात्र, आता राज्य सरकारने ही सुट्टी रद्द करण्याचा निर्णय घेतला आहे. शाळा शिक्षण विभागाने मंगळवारी एक परिपत्रक जारी केले आहे. यामध्ये सर्व सरकारी आणि खासगी शाळांना प्रजासत्ताक दिवसाच्या निमित्ताने देशभक्ती विषयावर विविध स्पर्धा आणि कार्यक्रमांचे आयोजन करण्याचे निर्देश दिले आहेत.
याचा उद्देश २६ जानेवारीला आपल्या विद्यार्थ्यांमध्ये राष्ट्राचा इतिहास, आपली महान संस्कृती आणि देशाच्या भवितव्याबद्दल राष्ट्रीय अभिमानाची भावना निर्माण करणे आहे. परिपत्रकात म्हटले आहे की, त्यामुळे २६ जानेवारी २०२५ पासून सर्व माध्यमांच्या सरकारी आणि खासगी शाळांमध्ये विविध कार्यक्रमांसह प्रजासत्ताक दिवस साजरा केला जाईल.
हे देखील वाचा: वारुळवाडीत कालव्यामध्ये उडी मारून जोडप्याची आत्महत्या; युवकाचा मृतदेह सापडला
या दिवशी होणाऱ्या कार्यक्रमांसाठी आठ स्पर्धा आणि उपक्रमांची यादी देण्यात आली आहे. ध्वजारोहणानंतर प्रभातफेरी, भाषण स्पर्धा, कविता स्पर्धा, नृत्य, चित्रकला, निबंध आणि खेळ स्पर्धा आणि प्रदर्शनांचा समावेश आहे. परिपत्रकात याचा उल्लेख आहे की हे सर्व कार्यक्रम देशभक्ती थीमवर आधारित असले पाहिजे. तसेच जिल्हा शिक्षण अधिकारी आणि शिक्षण निरीक्षकांना या निर्देशांचे काटेकोरपणे पालन करण्याचे आदेश देण्यात आले आहेत.
