पुण्यात पोलिसांकडून “बेटी बचाओ, बेटी पढाओ” चा नारा: महिला दिनानिमित्त भव्य दुचाकी रॅलीचे आयोजन
पुणे: आज 8 मार्च, जागतिक महिला दिनानिमित्त पुणे शहर पोलिसांकडून महिला सशक्तीकरणासाठी विविध कार्यक्रमांचे आयोजन करण्यात आले आहे. यावेळी परिमंडळ 5 अंतर्गत महिला पोलिसांच्या वतीने महात्मा फुले सांस्कृतिक भवन, वानवडी ते एम. एस. जोशी कॉलेज, हडपसर या मार्गावर भव्य दुचाकी रॅलीचे आयोजन करण्यात आले. या रॅलीतून “बेटी बचाओ, बेटी पढाओ” या उपक्रमाचा संदेश देण्यात आला.
या कार्यक्रमाचे आयोजन पोलीस उपायुक्त डॉ. राजकुमार शिंदे यांच्या मार्गदर्शनाखाली करण्यात आले. यामध्ये परिमंडळ 5 च्या सर्व पोलिस अधिकारी आणि अंमलदारांनी सहभाग घेतला. कार्यक्रमाच्या सुरुवातीला सिने अभिनेता पुष्कर जोग आणि अभिनेत्री प्राजक्ता गायकवाड यांच्या उपस्थितीत हिरवा झेंडा दाखवून रॅलीला प्रारंभ करण्यात आला.
महिला दिनाचे महत्त्व लक्षात घेता, कालच पुणे शहरासह उपनगरात असलेल्या दस्त नोंदणी कार्यालयांचे कार्य महिलांच्या हाती देण्यात आले. दस्त नोंदणीचे काम अत्यंत महत्त्वाचे असून, महिलांना यामध्ये जबाबदारी देऊन त्यांना समर्थपणे हे काम पार करण्याची क्षमता असल्याचे दिसून आले. यामुळे महिलांच्या सशक्तीकरणाच्या दिशा आणखी मजबूत होत आहेत.
हे देखील वाचा: जागतिक महिला दिनानिमित्त ‘रोकडेश्वर ज्वेलर्स’मध्ये चांदीच्या दागिन्यांच्या घडणावळीवर ५०% सूट!
या रॅलीमधून सर्वच स्तरांवर महिला सशक्तीकरणाचे महत्त्व पटवून देण्याचा प्रयत्न करण्यात आला. तसेच, या रॅलीने समाजातील प्रत्येक नागरिकाला “बेटी बचाओ, बेटी पढाओ” या संदेशाचे महत्त्व समजावले आणि त्यात महिलांच्या शिक्षण आणि संरक्षणावर अधिक लक्ष देण्याची आवश्यकता व्यक्त केली.
आजच्या या कार्यक्रमामुळे महिलांना समाजाच्या प्रत्येक क्षेत्रात समान हक्क मिळवून देण्यासाठी तसेच त्यांच्या सक्षमीकरणासाठी खूप मोठा संदेश दिला गेला. पोलिस विभागाच्या या उपक्रमामुळे पुण्यातील महिलांचे मनोबल आणखी उंचावले आहे.
