पुणे जिल्ह्यात ८ ठिकाणी उभे राहणार ‘रोप वे’; पर्यटनाला मिळणार मोठी चालना
मुंबई: महाराष्ट्र विधानसभा अधिवेशन सुरू असतानाच राज्य सरकारने पर्यटन क्षेत्राला प्रोत्साहन देणारा एक महत्त्वपूर्ण निर्णय घेतला आहे. राज्य सरकारने ४५ ठिकाणी रोप वे प्रकल्प उभारण्याचा निर्णय घेतला आहे, त्यामध्ये पुणे जिल्ह्यातील ८ ठिकाणांचा समावेश करण्यात आला आहे. या निर्णयामुळे पुणे जिल्ह्यातील पर्यटन क्षेत्राला मोठी चालना मिळणार आहे.
आमदार महेश लांडगे यांनी त्यांच्या सोशल मीडिया अकाउंटवर या निर्णयाची माहिती शेअर केली आहे. त्यांनी म्हटले आहे की, गेल्या काही वर्षांपासून पुणे जिल्ह्यातील विविध ठिकाणी रोप वे उभारण्याचे प्रयत्न सुरू होते, आणि आता राज्य शासनाने त्याला हिरवा कंदील दिला आहे.
पुणे जिल्ह्यातील ८ ठिकाणी रोप वे प्रकल्प उभारले जातील. यामध्ये छत्रपती शिवाजी महाराजांचे जन्मस्थळ असलेला किल्ला शिवनेरी, राजगड, सिंहगड, लेण्याद्री, दर्या घाट, भिमाशंकर ज्योतीर्लिंग, जेजुरी, खंडोबा या धार्मिक स्थळांचा समावेश आहे. या ठिकाणी रोप वे प्रकल्प उभारल्याने येथील पर्यटन क्षेत्राला मोठा प्रोत्साहन मिळेल, अशी अपेक्षा आहे.
हे देखील वाचा: राष्ट्रवादी काँग्रेस शरदचंद्र पवार पक्षात मरगळ; जुन्नर तालुक्यातील स्थिती व कार्यकर्त्यांची मागणी
या प्रकल्पांची सुरुवात राज्य सरकारच्या नेतृत्वात होईल, ज्या माध्यमातून महायुती सरकार पुणे जिल्ह्यातील पर्यटन क्षेत्राला महत्त्व देत आहे. या निर्णयाचे स्वागत करत, आमदार महेश लांडगे यांनी पोस्ट करत सरकारच्या कामगिरीला सन्मान दिला आहे.
यामुळे पुणे जिल्ह्यातील पर्यटकांना सुविधा मिळेल आणि येथील ऐतिहासिक व धार्मिक स्थळांचा प्रसार होईल, असा विश्वास व्यक्त करण्यात आला आहे. तसेच, राज्य सरकारच्या या निर्णयामुळे महाराष्ट्रातील पर्यटन उद्योगाला नवसंजीवनी मिळेल, असा अंदाज आहे.
