घरी मागविलेल्या चॉकलेट शेकमध्ये आढळले उंदराचे पिलू ; कॅफे मालकाविरुद्ध गुन्हा दाखल
पुणे: पुणे शहरातून एक धक्कादायक प्रकार समोर आला आहे. घरपोच मागवलेल्या चॉकलेट शेकमध्ये उंदराचे पिलू आढळून आल्याची संतापजनक घटना उघडकीस आली आहे. याप्रकरणी विमानतळ पोलिसांनी चॉकलेट शेक देणाऱ्या कॅफे मालकाविरुद्ध गुन्हा दाखल केला आहे.
तक्रारदार तरुणाच्या मैत्रिणीने १४ फेब्रुवारी रोजी विश्रांतवाडी भागातील एका कॅफेतून चॉकलेट शेक मागविला होता. तिने घरपोच खाद्यपदार्थ देणाऱ्या एका ॲपवर नोंदणी करून चॉकलेट शेक मागविला होता. तरुणी लोहगाव भागात वास्तव्यास आहे. चॉकलेट शेक घेऊन रात्री एक कामगार तरुणीच्या घरी आला. तरुणीने चॉकलेट शेक घेतला आणि पिण्यापूर्वी ग्लास पाहिला असता, त्यात मृतावस्थेतील उंदराचे पिलू आढळले. या घटनेनंतर तरुणीने आपल्या मित्राला या घटनेची माहिती दिली.
हे देखील वाचा:पाचगणीच्या पठ्ठयाने ट्रॅफिक जाम मध्ये पॅराग्लायडिंग करून दिला पेपर
तरुणाने तत्काळ संबंधित कॅफे मालकाशी संपर्क साधून विचारपूस केली असता, कॅफे मालकाने त्याला धमकावले. चॉकलेट शेक तयार करताना मिक्सरमध्ये उंदराचे पिलू पडल्याचे उघड झाले. तक्रारदार तरुणाने दाखल केलेल्या तक्रारीनुसार, खाद्यपदार्थ तयार करताना पुरेशी काळजी न घेता ग्राहकांच्या जीविताला धोका होईल असे कृत्य कॅफे मालकाने केल्याचे म्हटले आहे.
विमानतळ पोलीस ठाण्याचे वरिष्ठ पोलीस निरीक्षक अजय संकेश्वरी आणि गुन्हे शाखेचे पोलीस निरीक्षक विजय चंदनशिव यांनी कॅफेला भेट दिली. तरुणाने दिलेल्या तक्रारीनुसार गुन्हा दाखल करण्यात आला आहे. पोलीस हवालदार ए. एस. आदलिंग या प्रकरणाचा तपास करत आहेत.
