जाळे टाकताना तोल गेला, मासेमारीत पाण्यात बुडाला; शोध मोहीम थांबवण्यात आली
सातारा: तापोळा येथील आपटी गावात एका बोटीवरून मासेमारी करताना किसन धोंडीबा कदम (वय ४३) यांचा तोल गेला आणि कोयना धरणाच्या शिवसागर जलाशयात बुडाले. अनेक तासांच्या शोध मोहिमेनंतरही बचाव पथक त्यांना शोधू शकले नाही.
मिळालेल्या माहितीनुसार, तापोळा येथील आपटी येथील किसन धोंडीबा कदम शुक्रवारी रात्री सुमारे ७ ते ८ वाजता शिवसागर जलाशयात मासेमारीसाठी गेले होते. जाळे टाकताना त्यांचा तोल गेला आणि ते पाण्यात बुडाले. काही वेळातच ही बातमी गावात वाऱ्यासारखी पसरली.
हे देखील वाचा: पीएफ पैसे काढणे आता अधिक सोपे; बँकेसारखे कार्य करण्याची नवीन सुविधा
घटनेबाबत गावचे पोलीस पाटील शामराव गायकवाड यांनी पोलिसांना सर्व माहिती दिली. त्यानंतर स्थानिक नागरिकांनी आज सकाळपासून शोध मोहीम सुरू केली. तापोळा खोऱ्यातील अनेक नागरिकांनी शोध मोहिमेत भाग घेतला. अनेकांनी बोटीने शोधण्याचा प्रयत्न केला. पण गायब झालेल्या कदमांचा शोध लागला नाही.
सकाळी सुमारे अकरा वाजता महाबळेश्वर, सह्याद्री आणि शिवेंद्रसिंहराजे भोसले बचाव पथकाचे कर्मचारी घटनास्थळी दाखल झाले. या पथकानेही कदमांना शोधण्याचा अथक प्रयत्न केला, पण त्यांचा शोध लागला नाही. संध्याकाळी उशिरा बचाव पथकाने शोध मोहीम थांबवली.
