बाणेर-बालेवाडीत राष्ट्रवादीचा धमाका! अमोल बालवडकरांचा भाजपच्या बालेकिल्ल्यात विजय
पुणे | १७ जानेवारी २०२६ पुणे महानगरपालिका निवडणुकीत सर्वात जास्त चुरस आणि राजकीय चर्चा ज्या प्रभागाची होती, त्या बाणेर-बालेवाडी (प्रभाग ९) मध्ये अखेर राष्ट्रवादी काँग्रेसने ऐतिहासिक विजय नोंदवला आहे. राष्ट्रवादीचे उमेदवार अमोल बालवडकर यांनी भाजपचे उमेदवार लहू बालवडकर यांचा सुमारे ८०० मतांच्या फरकाने पराभव करत बाणेरमध्ये घड्याळाचा गजर केला आहे. या विजयामुळे भाजपच्या अभेद्य मानल्या जाणाऱ्या किल्ल्याला मोठे खिंडार पडले आहे.
अमोल बालवडकर: बंडखोरी ते दणदणीत विजय
अमोल बालवडकर यांच्यासाठी ही निवडणूक केवळ राजकीय लढाई नव्हती, तर ती एक प्रतिष्ठेची लढाई होती. भाजपचे माजी नगरसेवक असूनही ऐनवेळी तिकीट नाकारल्याने त्यांनी राष्ट्रवादी काँग्रेसमध्ये (अजित पवार गट) प्रवेश केला होता. उपमुख्यमंत्री अजित पवारांनी बाणेरमध्ये स्वतः सभा घेऊन बालवडकरांना ताकद दिली होती. या विजयाने बालवडकरांनी आपले जनमत आणि ताकद पुन्हा एकदा सिद्ध केली आहे.
बाबुराव चांदोरेंचाही मोठा विजय
अमोल बालवडकर यांच्यासोबतच राष्ट्रवादी काँग्रेसचे ज्येष्ठ नेते बाबुराव चांदोरे यांनीही विजयाची मोहोर उमटवली आहे. चांदोरे यांनी भाजपचे गणेश कळमकर यांचा १४०० मतांच्या फरकाने पराभव केला. या प्रभागातून राष्ट्रवादीच्या दोन उमेदवारांनी विजय मिळवल्याने भाजपच्या “पॅनेल” विजयाचे स्वप्न धुळीस मिळाले आहे.
हे देखील वाचा: अमोल बालवडकर निकाल: बाणेर-बालेवाडीच्या ‘हाय-व्होल्टेज’ निकालाकडे संपूर्ण पुण्याचे डोळे; जाणून घ्या विलंबाचे खरे कारण
भाजपच्या पराभवाची ‘सल’ कायम
पुणे शहरात अनेक ठिकाणी भाजपचे वर्चस्व राहिले असले तरी, ‘स्मार्ट सिटी’ म्हणून ओळखल्या जाणाऱ्या बाणेर-बालेवाडीमध्ये भाजपला पराभवाचा सामना करावा लागला आहे. मंत्री चंद्रकांत पाटील आणि मुरलीधर मोहोळ यांनी हा प्रभाग प्रतिष्ठेचा केला होता. मात्र, स्थानिक विकासकामे आणि बालवडकरांचा जनसंपर्क भाजपच्या रणनीतीवर भारी पडला.
काय होते विजयाचे गमक?
थेट संवाद: अमोल बालवडकर यांचा तरुण कार्यकर्त्यांशी असलेला थेट संपर्क.
प्रचंड कामे: गेल्या पाच वर्षांत बाणेर-बालेवाडी परिसरात बालवडकरांनी राबवलेले प्रकल्प.
अजित पवारांची साथ: उमेदवारी अर्ज भरण्याच्या शेवटच्या क्षणी मिळालेली राष्ट्रवादीची साथ आणि पवारांची जाहीर सभा.
नाराजीचा फटका: भाजपमधील तिकीट वाटपावरून झालेली अंतर्गत नाराजी बालवडकरांच्या पथ्यावर पडली.
