कारेगावमध्ये दहशत: मनी ट्रान्सफर दुकानावर डाका; डाकेप्रकरणी २४ तासांत आरोपी ताब्यात
रांजणगाव गणपती: कारेगाव शिरूर येथील चिंतामणी रुग्णालयाजवळ असलेल्या मनी ट्रान्सफर दुकानात चार जणांनी दुकानात तोडफोड करून पस्तीस हजार रुपये चोरल्याची घटना घडली आहे. या संदर्भात रांजणगाव एमआयडीसी पोलीस स्टेशनमध्ये चार जणांविरुद्ध गुन्हा नोंदवण्यात आला आहे. पोलिसांनी २४ तासांच्या आत चारही आरोपींना अटक केली आहे.
प्रथमेश उर्फ बच्चा नवले, आयर्न नवले, ओम पवार व वैभव गाडे सर्व रा. कारेगाव, शिरूर, पुणे यांच्या विरोधात गुन्हा नोंदवून त्यांना अटक करण्यात आली आहे. ज्ञानेश्वर कान्हू डांगे वय २१, रा. सोन सांगवी, शिरूर, पुणे यांनी रांजणगाव एमआयडीसी पोलीस स्टेशनमध्ये तक्रार नोंदवली.
काय घडलं नक्की?
कारेगाव शिरूर येथे ज्ञानेश्वर डांगे आणि ऋषिकेश डांगे त्यांच्या मनी ट्रान्सफर दुकानात असताना, प्रथमेश नवले आणि आणखी तीन जण दुकानात आले आणि त्यांनी ज्ञानेश्वर आणि ऋषिकेशला दहशत निर्माण करून दुकानाचे शटर बंद केले. यानंतर त्यांनी भीती दाखवून दुकानाच्या दरवाजाचे काचेचे तुकडे आणि फिंगर प्रिंट घेणारी डिवाइस मशीन खराब केली. तसेच हातात कोयता दाखवून दुकानाच्या ड्रावरमधून पस्तीस हजार रुपये चोरले, चारही जण फरार झाले.
हे देखील वाचा: आरटीओचे पुण्यासाठी हेलमेट नियम
घटनेची माहिती मिळताच पोलीस घटनास्थळी दाखल झाले. घटना घडल्याची सीसीटीव्ही फुटेज तपासल्यावर चार आरोपी असल्याचे आढळले. आणि त्यानुसार सदर गुन्ह्यात लुटीची अतिरिक्त कलमं लावण्यात आली आहे.
घटनेनंतर पोलीस निरीक्षक महादेव वाघमोडे यांनी आरोपींचा शोध घेण्यासाठी तीन वेगवेगळ्या तपास पथकांची नियुक्ती केली. या तपास पथकाच्या मदतीने २४ तासांच्या आत घटनास्थळी आरोपींचा शोध घेण्यात यश आले आहे. तसेच सदर गुन्ह्यातील मुख्य आरोपी प्रथमेश उर्फ बच्चा नवले याचा शोध घेतला जात आहे. पुढील तपास पोलीस निरीक्षक महादेव वाघमोडे यांच्या मार्गदर्शनाखाली सहाय्यक पोलीस निरीक्षक निळकंठ तिडखे करत आहेत.
