गजा मारणे पार्टी प्रकरण: पुणे पोलिसांवर मोठी कारवाई
पुणे: पुण्यातील कुख्यात गुंड गजा मारणे याच्यासोबत मटण पार्टी करणे पुणे पोलिसांना चांगलेच महागात पडले आहे. या प्रकरणी एका अधिकाऱ्यासह चार पोलिसांना निलंबित करण्यात आले आहे. काही महिन्यांपूर्वी सांगली कारागृहात घेऊन जात असताना हा प्रकार घडला होता. पार्टीची संपूर्ण घटना ढाब्यावरील सीसीटीव्हीमध्ये कैद झाली होती. पुणे पोलिस आयुक्तांना हा प्रकार समजताच त्यांनी या संपूर्ण प्रकरणाची चौकशी सुरू केली आणि मटण पार्टी उघडकीस आली.
याबाबत मिळालेल्या माहितीनुसार, गजा मारणे सध्या मोक्का अंतर्गत पुण्यातील येरवडा कारागृहात शिक्षा भोगत आहे. काही महिन्यांपूर्वी त्याला सांगली कारागृहात हलवण्याचा निर्णय घेण्यात आला होता. सहाय्यक पोलीस निरीक्षक आणि चार पोलीस कर्मचारी गजा मारणेला घेऊन पोलीस व्हॅनमधून सांगलीला निघाले होते. मात्र, वाटेत एका ढाब्यावर त्यांनी गजा मारणेला मटणाचे जेवण दिले. ही घटना ढाब्यावरील सीसीटीव्हीत कैद झाली. गुन्हे शाखेच्या अधिकाऱ्यांनी तपासणीदरम्यान सीसीटीव्ही फुटेज तपासले आणि हे प्रकरण उघडकीस आले. या प्रकरणी दोषी पोलिसांवर कठोर कारवाई करण्यात आली आहे.
एखाद्या आरोपीला एका कारागृहातून दुसऱ्या कारागृहात हलवताना पोलिसांना काही नियम आणि प्रोटोकॉल पाळावे लागतात. मात्र, पोलिसांनी एका गुन्हेगारासोबत ढाब्यावर जेवण करून या नियमांचे उल्लंघन केले, अशी चर्चा आता सुरू झाली आहे.
आयुक्त रंजन कुमार शर्मा यांनी एका अधिकाऱ्यासह चार पोलिसांना निलंबित केले आहे. बेशिस्त आणि बेजबाबदार वर्तन केल्याचा ठपका त्यांच्यावर ठेवण्यात आला आहे. गजा मारणेला ढाब्यावर भेटलेल्या सतीश शिळीमकर, विशाल धुमाळ आणि बाळकृष्ण उर्फ पांड्या मोहिते यांच्यावरही कारवाई करण्यात आली आहे.
गुंड गजा मारणे कोण आहे?
गजानन उर्फ गजा मारणे हा पुण्यातील एक कुख्यात गुंड आहे. कोथरूड परिसरात मारणे टोळीचा म्होरक्या म्हणून तो ओळखला जातो. त्याच्यावर खून, खुनाचा प्रयत्न, खंडणी, अपहरण, बेकायदा शस्त्र बाळगणे यांसारखे ३० गंभीर गुन्हे दाखल आहेत. पुणे आणि जिल्ह्यात त्याची मोठी दहशत आहे. २०२५ मध्ये केंद्रीय मंत्री मुरलीधर मोहोळ यांच्या कार्यकर्त्याला मारहाण केल्याप्रकरणी त्याच्यावर मोक्का अंतर्गत कारवाई झाली होती. यापूर्वीही त्याच्यावर पाच वेळा मोक्का लावण्यात आला आहे. २०२२ मध्ये २० कोटींच्या खंडणी प्रकरणात त्याला अटक झाली होती. तळोजा कारागृहातून सुटल्यानंतर त्याने ३०० गाड्यांसह मिरवणूक काढली होती, ज्यामुळे त्याला पुन्हा तुरुंगात जावे लागले होते.
