ससून रुग्णालयातील कर्मचार्यांची भरती प्रक्रिया लवकरच सुरू होईल; आठ दिवसांत अपेक्षित निर्णय
पुणे: ससून रुग्णालयात २३५० पदे मंजूर केली गेली असून त्यापैकी ७८९ पदे रिक्त आहेत. विशेषत: परिचारकांची १६० पदे रिक्त असून चतुर्थ श्रेणी कर्मचार्यांच्या ५० टक्के पदेही भरलेली नाहीत. यामुळे रुग्णालयाच्या कामकाजावर प्रचंड ताण येत आहे. तथापि, ससून रुग्णालयासाठी आवश्यक असलेल्या कर्मचार्यांची भरती प्रक्रिया लवकरच सुरू होणार आहे, अशी माहिती वैद्यकीय शिक्षण राज्यमंत्री माधुरी मिसाळ यांनी विधानसभेत दिली.
विधानसभेत कॅन्टोन्मेंट विधानसभा मतदारसंघाचे आमदार सुनील कांबळे यांनी ससून रुग्णालयातील विविध समस्यांवर प्रश्न उपस्थित करत तातडीने उपाययोजना करण्याची मागणी केली होती. त्यावर प्रतिक्रिया देताना राज्यमंत्री माधुरी मिसाळ यांनी याप्रकरणी वस्तुस्थिती मान्य करत आठ दिवसांत कर्मचारी भरती प्रक्रिया सुरू करण्याचे आश्वासन दिले.
ससून रुग्णालयातील रिक्त पदांची भरती प्रक्रिया टीसीएसच्या माध्यमातून जिल्हाधिकारींच्या परवानगीने केली जाते. येत्या आठ दिवसांत याबाबत कार्यवाही सुरू होईल, तसेच वर्ग-१ चे ४४ आणि वर्ग-२ चे ११० रिक्त पदे तत्काळ भरली जातील, असे त्यांनी सांगितले.
ससून रुग्णालय ही पश्चिम महाराष्ट्रातील एक महत्त्वाची वैद्यकीय संस्था आहे. येथे पुणे आणि पिंपरी-चिंचवडसह संपूर्ण राज्यभरातून रुग्ण उपचारासाठी येतात. या रुग्णालयात वर्षाला साडेपाच लाख रुग्ण बाह्यरुग्ण विभागात येतात. सध्या पुणे शहरातील सुमारे साठ हजार रुग्ण रुग्णालयात अॅडमिट आहेत. रुग्णालयात १५५ खाटांचा आयसीयू आहे, मात्र त्यामुळे रुग्णालयावर अधिक ताण पडत आहे, अशी माहिती मिसाळ यांनी दिली.
हे देखील वाचा: जुन्नरच्या निखिल कोकाटेने माउंट किलीमांजारो चढून आदिवासी समाजासाठी इतिहास रचला
पुण्यात कॅन्सर हॉस्पिटल उभारण्याचा प्रस्ताव
पुण्यात कॅन्सर रुग्णांच्या वाढत्या संख्येचा विचार करता, राज्य सरकार कॅन्सर हॉस्पिटल उभारण्याच्या विचारात आहे. ससून रुग्णालयाच्या परिसरातच या हॉस्पिटलसाठी योग्य जागा असल्याची माहिती मिसाळ यांनी दिली. यासाठी एमएसआरडीसीकडे जागेची मागणी करण्यात आली आहे.
औषधांचा तुटवडा आणि सुधारणा
ससून रुग्णालयात औषधांचा तुटवडा होण्याच्या तक्रारी आल्या होत्या. या पार्श्वभूमीवर नुकतीच १२ कोटी ९४ लाख रुपयांची औषध खरेदी केली गेली आहे. तसेच, आवश्यक उपकरणांची खरेदी करण्यात आली आहे. जिल्हा नियोजन समितीकडे आणखी औषध खरेदीची मागणी केली आहे.
ससून रुग्णालयामध्ये पायाभूत सुविधा आणि प्रशासनाची अनेक गंभीर समस्या आहेत. वैद्यकीय उपकरणे, शस्त्रक्रिया साधनसामग्री आणि औषधांचा तुटवडा नेहमीच जाणवतो. विशेषतः आपत्कालीन सेवा आणि सर्जरी विभागातील समस्यांमुळे गरीब आणि गरजू रुग्णांना खासगी रुग्णालयांवर अवलंबून राहावे लागते, ज्यामुळे आर्थिक अडचणींना सामोरे जावे लागते.
ससून रुग्णालयाच्या समस्यांवर आमदारांचा आवाज
आमदार सुनील कांबळे यांनी रुग्णालयाच्या विविध समस्यांवर लक्ष वेधले. त्यांनी विशेषतः स्वच्छतेची कमी आणि एमआरआय मशीनच्या उपलब्धतेची समस्या मांडली. सिध्दार्थ शिरोळे यांनी ससून रुग्णालयासाठी व्हीलचेअर खरेदी करण्यासंबंधी मागणी केली आहे.
रुग्णालयातल्या या तातडीच्या समस्या लवकरच सोडवण्याचे आश्वासन राज्य सरकारने दिले आहे, आणि रुग्णालयाच्या सुधारणा कार्ये सुरू होणार असल्याचे स्पष्ट केले आहे.
